Halpuah, halmawi, silailem mu nei chi, sky lantern khap bur dawn

24

No.2558/2021-2022
Aizawl, the 11th October, 2021: Vawiin khan Chief Secretary Pu Lalnunmawia Chuaungo hovin Police Headquarters-ah kumin Krismas, Kumthar leh Puja (Dusshera, Diwali leh a dangte) lo thleng turah halpuah, halmawi, silailem mu nei chi leh sky lantern khap chungchang Sawrkar mi pawimawhte leh tlawmngai pawl hruaituten an rel. Heng hal theih hrang hrangte hi mihring hriselna atana thil pawi thei leh COVID19 hri len lai phei chuan nghawng tha lo tak nei thei a nih avangin khap tlat ni se, an ti.

Chief Secretary Pu Lalnunmawia Chuaungo chuan kuminah hian ngawrh leh zualin hma lak a ni dawn, a ti a. Halpuah leh halmawi chi hrang hrangin boruak a tihchhiat avangin kutpui hunlaiin awmna, khuh, chuap lam khawih natna a pung hluai thin tih medical thiamna chuan a nemnghet tawh a, COVID19 nasa taka a len mek lai a nih avangin mipui hriseln nan khawng leh zuala khapna kalpui tul a tih thu a sawi a ni.

Vawiin meeting hian kum kaltaa khapna kalpui a nih dan a thlir let a. Krismas leh Kumthar bawra dan bawhchhia mi 22 case siam sak niin an zinga 7 chu hrem (convict) an ni tawh a, court case kal lai mek 15 a la awm a ni. Meeting-in a lo rel tawh angin halpuah hal khapna thupek zawm tha Branch YMA te hnenah Home Minister chuan lawmman a pe bawk a ni.

Khapna thupek hi a rang thei ang bera tihchhuah turin meeting chuan a rel a. Dan anga khapna thupek tihchhuah a nih veleh Addl. SP Aizawl kaihhruaina hnuaia din Special Cell te chuan hma an la tan nghal dawn a. Chutiang bawkin, veng hrang hrangah tlawmngai pawl te leh Local Council te pawhin anmahni zawn theuhah hma an la nghal dawn a ni.

Halpuah, halmawi leh a dangte mihring hriselna atana a pawizia inzirtirna leh hal lo tura mipui thinlung hneh tura campaign uar leh zuala kalpui ni se, tih a ni a. Veng tina information mike te, print leh electronic media te leh social media kaltlangin awareness campaign kalpui tum a ni. Sumdawng te mai bakah mimal leh chhungkaw tin te chu heng halpuah, halmawi, sky lantern leh silailem mu kapchhuak theite hi chah lo turin ngen an ni a; lo chah ru emaw, zuar an awm a nih chuan dan angin hrem an ni dawn a ni. Assam Rifles, BRTF, BSF leh sipai hmunah halpuah an hal loh na turin khapna order pek ni se tiin meeting chuan a rel a. Mizoram ram ria check gate awm zawng zawngah uluk lehzuala lirthei lo lut endik tur te, sumdawnna hmun leh kudam te a tul dan a zira endik/check te leh police te bakah tlawmngai pawl ten hunpui laiin duty tur insiam leh ni se tih te an rel a ni.

Источник