Vawiin khan MZP Headquarters Lunglei buatsaihin Lunglei a Pawlsawm leh Pawl sawmpahnih Board Exama zirlai ti thate chawimawina Convention Centre Lungleiah neih a ni a, Agriculture Minister Pu C. Lalrinsanga chuan khuallian niin a hmanpui.
He hun hi MZP Headquarters Lunglei Vice President K. Lalremruata’n a kaihruai a, khuallian chuan thu sawiin zirlai ti tha tak tak te chu a lawmpui thu sawiin tuna an dinhmun chu an zir zelna turah pawh vawng nung zel turin a chah a, lehkha thiam, zirna a tui si, chhungkaw harsatna avanga chhunzawm thei lo engemaw zat an awm a rin thu sawiin chungte tan chuan an zirna turin theihtawp chhuah a inhuam thu a sawi bawk. Minister chuan zirlai ten a tha ber leh sang ber tum tlat zel turin a chah a, chu chu hnam humhalhna kawng pawimawh tak a ni tiin ei leh bara ram khaiding tur pawhin thiamna a ngai a, zirlaite chu ruihtheihthil leh thatchhiatna laka inham buai hman an nih loh zia sawiin hmathlir mumal tak neia lehkha zir turin a fuih a ni. Pu C. Lalrinsang chuan Lunglei in hun reitak MCS kan neih tawh lo hnuin kumin ah H. Vanlalbiakzaua kan nei chu a lawmpui thu a sawi .HSLC Topper 3 leh HSSLC Topper 2 te hnena lawmpuina Rs 20,000/= theuh a pe bawk.
Vawiina zirlai tithate chawimawina hunah hian MZP General Hqrs. President L. Ramdinliana pawhin thusawiin kum dang aiin kumin HSLC leh HSSLC result tha lo mahse a quality zawk a, a chhan chu Distinction an tam vang ani ati. Tunlai inelna ah thluak inang a hmang thiam apiang an dingchhuak thin a, chuvangin inthlahdah lova hmathlir nei a zir theuh turin a chah bawk ani. MZP Hqrs. Lunglei President Lalrammuana te pawhin zirlaite fuihna thu sawiin engemaw hunlai atangin zirna ah chimlam kan lo muthlu ta deuh thanharh nan Kum 2008 atangin zirlai ti tha chawimawi tan a ni a tia. Mi in a an tih theih chu taimakna leh thawhrimna nena thawh chuan a tih ve theih thu a sawi a, tuna chawimawina hi duhtawh lovin chawimawi tlak ni zel tura zir theuh turin a fuih bawk ani.
Vawiina zirlai ti tha chawimawi takte hi HSLC exan result chhuak taa Lunglei atanga pasarihna dinhmun hauhtu mi 3 te leh HSSLC exam a Science leh Commerce a topper Lunglei khua a mite bakah HSLC leh HSSLC Distinction a pass zirlai 125 leh MCS a tling 1 te an ni.
