State Board for Wildlife (SBWL), Mizoram chu vawiin khan an Chairman Chief Minister Pu Zoramthanga kaihhruaiin CM Conference Hall-ah kumina a vawi khatna atan an thukhawm. He meeting-ah hian Vice Chairman, Environment, Forests & Climate Change Minister Pu TJ Lalnuntluanga leh member dangte an tel a ni.
Chief Minister chuan sawrkarin hmasawnna project hrang hrang a kalpui naah a theih ang chen chen a nungcha leh thing leh mau te humhalh zel chunga kalpui a duh thu a sawi a. Vawiin SBWL meeting-ah hian India leh Bangladesh inrina a hungna siam, Border Fencing hna thawh mek atan leh fencing te chhun eng reng tur “flood light” chawmtu tur kawlphetha mamawh 132 kV power grid kalkawng in Dampa Tiger Reserve a tan tlang dawn avanga environment atana harsatna awm thei te ngaihtuahho a ni a. Ram venhimna thil a nih avangin border fencing chu a pawimawh hle a, nungchate tana harsatna tlem thei ang ber turin he power grid siamnaah hian a sawrkar department-te leh NGO te thawkho in uluk taka invil tawn ni se tiin rel a ni. Meeting-ah hian Phawngpui National Park leh Ngengpui Wildlife Sanctuary enkawl zui zelna kawnga District Council atanga zawhna awm te ngaihtuah ni bawkin sawrkar laipui rawn ni se tia rel a ni. Serlui ‘B’ a Dan lova bomb hmanga sangha man an awm thin thu te meeting-ah hian sawilan niin, khauh zawka khuahkhirh hna thawh nise tih a ni a. Nungcha leh ramngaw humhalhna kawnga Mizoramin hma a sawn theih nan hetiang kawnga khua titha te thlanchhuah a lawmman pek dan ruahman ni se tia rel a ni bawk.
Ministry inthlak ah State Board for Wildlife pawh hi reconstitute niin, Chairman ah Chief Minister leh Vice Chairman atan Forest Minister bakah Pu Larinsanga Ralte, MLA, Pu C. Lamuanpuia, MLA leh Prof. F. Lalnunmawia, MLA te chu member an ni bawk. Mizoram State Board for Wildlife ah hian a vaiin member 31 an awm a. Kum tin vawi hnih tal inhmukhawm tur niin, Board term khat hi kum 3 zel a ni.
