MZP Sub-Hqrs Bairabi buatsaih Mizo Zirlai titha chawimawina chu Home
Minister Pu K Lalchamliana’n vawiin khan Bairabi North Branch YMA Hall ah a
hmanpui.
Khuallian chuan zirlai titha leh zirtirtu kalkhawm te chu lawmpuina
chibai bukin zirlai nih chuan tum mumal neih a ngai a chu chuan hlawhtlinna
kawngah min hruai thin a ni a ti. Zirlai nih chhung hi leadership quality zir
na hun tha ni a, pawl hrang hranga inhman pawhin zirlai tibahlah khawpa inhmang
lo turin zirlai kalkhawm te a fuih a, eng kawng pawh zawh dawn ila D pathum
Determination (tum ruhna), Devotion (in pekna) leh Discipline (mahni inthunun)
chu vawn tlat a pawimawh ani tiin thangtharte chu chhungkua, Ram leh Hnam tan
mi chhenfakawm ni turin tum nghet tak nei chunga zirlai kawng zawh turin a chah
a. All India Service leh Central Service a Mizo te kan lut tlem ta lutuk chu
veiawm a tih thu sawiin heng service te hian Sawrkar ah post pawimawh tak tak
an chelh thin si a, heng post te chelh pha tur hian tan kan lak a hun takzet
ani a ti.
Ram leh Hnam humhalhna kawnga kan hmalak dan ah midang huatna tel
loin a theih chin chin ah kan Ram leh Hnam kan humhalh anga, Ramri buai chu
tawngkama sawifel a nghet ber ani tiin tharum hmanga chin fel chi a nilo a ti
a, Sawrkar ina Ramri chingfel tura a hmalak dan tur chu a sawi a sawifel tum
ani tiin rang taka chinfel chu Sawrkar mawhphurna a nih thu a sawi bawk.
Thangtharte nun ah aia upa zah na kan tlachham ta viau mai chu pawi a tih thu
sawiin Mizo nunze mawi tlawmngaihna leh aia upa zah chu vawng nung reng turin
kalkhawm zirlai te a chah a ni.
Home Minister chuan Bairabi chu ramri a awm a ni a, Police te chu
indaih lohna avangin ramri venna kawngah pawh duhthu an sam lo thin maithei a,
heng kawngah te hian Bairabi khawtlang in Police te tha taka an thawhpui thin
avangin lawmthu a sawi a, Remna leh muanna a awm zel theihnan thawhhopui ah a
sawm bawk a ni.
Khual zahawm FCS&CA changtu Minister Pu K Lalrinliana chuan
Bairabi khuaa zirlai titha chawimawi tur an awm nual bakah sikul pakhat HSLC
exam a za a za pass thei Rinsanga Memorial English School chu chhuanawm a tih
thu sawiin Bairabi khua hmasawnna turin Sawrkar in ngaituahna a sen reng thu a
tarlang a tun dinhmunah Bairabi khua chu SDO (civil) thuthmun tura ruahman mek
niin cheng nuai 90 chuang senna tur Office Building sak hna pawh tan chhoh
thuai a nih tur thu a sawi a ni. Hemi bakah hian Agriculture Extension Officer,
SDO (P&E) leh Bairabi khaw dai ah Oil dah khawlna tur hmun te pawh
ruahmanin kawng dap chhoh mek a nih thu a sawi bawk. Pu Lalrinliana chuan
zirlai te chu fuihin ‘Ram tan enge kan tih theih ang, Intodelh Hnam ni turin
engtin nge ka zirlai ka nunpui theih ang’ tih te hi mahni inzawt nawn fo turin
a chah a, awmze neia zirna kawng zawhin Ram leh Hnam intodelh kan nih theihnan
ngaituahna seng thin turin zirlai kalkhawm te chu a chah bawk a, Kolasib A/C
bialtu MLA/Minister hian Sub-Hqrs MZP Bairabi tanpui nan sum fai a hlan bawk a
ni.
Mizo zirlai titha chawimawina hun hi Pu Hmingthansanga, Vice
President MZP Hqrs in a kaihruai a he hunah hian Zirlai HSCL leh HSSLC 1st
Division a pass chin mi 22 chawimawi an ni a, Sawrkar Official hrang hrang,
zirlai, zirtirtu bakah Bairabi khawtlang hruaitute an kalkhawm a Laldingliana,
information Secretary in lawmthu sawina in hun a khar a ni.
