Kolasib multipurpose
cooperative society chuan vawiin khan DIPRO Conference Hall ah General Assembly
vawi 2 na an hmang, kolasib Bawrhsap Pu Zoengsanga chu khuallian niin he hun hi
a hmanpui.
Bawrhsap chuan Society
naupang te ni siin thangduang taka an kal chho chu thil lawmawm leh chhinchhiah
tlak tak ani tiin society chu bul tanna tur neilo mi harsa zawk te tan
malsawmna ani a ti. Society hi hlawhtling taka kalpui tur chuan thawh hona tha,
tan rualna, tei rei peihna leh sum leh pai a rinawm na te a ngai ani a ti a
member ten society thil tum ah kan chiang tur ani a, hlawkna ringawt nilo
hlawkna tel tho si a mipui te tan malsawmna nih tum tlat a pawimawh ani ati.
Bawrhsap chuan KMCS
Ltd. chu thang zel se, member te pawh pung chho zel se mipui ten hlawk pui taka
an chhawr tangkai zel theih nan duhsakna a hlan a, zau zawka mipui ten an hriat
theihnan awareness te kalpui ni se member te pawhin society dawr atang ngeiin
an nitin mamawh te lei thin in neitu rilru pu tlat turin kalkhawm member te a
chah bawk a ni.
KMCS Ltd. Treasurer
Dr. C Lalmuankima tarlan danin KMCS hma thlir leh tum bulpui ber chu in elna
thianghlim (fair competition) hmanga bazar a bungraw man thunun (market price
control) ani a, KMCS Ltd. dawr ah hian nitin mamawh chu man tlawm zawka mipui
te hnena hralh chhuah niin hlawkna ngawr ngawr an um lova, chawi belh si loa
tlawm thei ang bera mipui te laka sumdawn leh mipui rawngbawl chunga member te
dinhmun chawikan ani a ti.
KMCS Ltd. Vice
Chairman Pu S.K. Das tarlan danin KMCS Ltd. hi Sawrkar a an in ziahluh
atangin kum hnihna an hmang mek a, member awmsa 30 niin vawiin ni hian
member 4 lakluh thar an ni a, an vaiin member 34 an ni. Hemi hun chhunga KMCS
Ltd. Store in a thil hralh chhuah zawng zawng hlut na hi cheng 21,45, 056 hu
ani a, an bungraw hralh te hi chawh rualin bazaar rate aia a tlawmna chu za
zela sawm leh pali (14%) niin bazar rate nena khaikhin in an bungraw hralh
chhuah atangin mipui ten cheng 2,50,000/- vel an hum (save) a ni.
He hun hi KMCS Ltd.
Chairman Pu B Lalremliana’n a kaihruai a chawhnu lamah rorel inkhawmna hun hman
a ni.
