Vawiin khan Mizoram Rubber Planters Association (MIRPA) General Headquarters, Aizawl buatsaihin a vawi khatna atan MIRPA General Body Meeting chu Land Resource, Soil and Water Conservation Department (LRS&W) Conference Hall-ah neih a ni a. LRS&W Minister Pu R.Lalzirliana chu khuallian niin Rubber and Allied Crops Development Committee Vice Chairman Pu Lalrinsanga Ralte, Serlui bialtu MLA chu khual zahawm a ni.
Mizo mipui tam zawk innghahna chu lo neiha ei zawn, leilunga innghat a nih avangin sawrkar pawhin a ngai pawimawh a, lo neitute din chhuahna tur atan ruahmanna tha tak tak a siam thin Minister Pu R.Lalzirliana chuan a ti a. Heng sum leh pai, lo neitute tanpui nana sawrkarin a dah hi a hmangtuten a nihna tur dik taka an hman a tul a ni, a ti. Mipui kan pung a, khua-in lo atana ram a mamawh a zau zel a, kum tam leng hman lo ramte loh theih lohva theh a ngai ta hian nasa takin buh leh bal tharchhuah a nghawng a, sum pai dinhmun thlengin a tlak hniam phah a ni, Minister chuan a ti a. SEDP hmangin sawrkarin lo neitute chawikanna tur ruahmanna a siam leh dawn a, Development Committee hrang hrang siamin lo neitute kal dan tur ngun taka ngaihtuah a ni dawn, tiin a chhawrtu mipuiten tumruhna nen tangkai taka hmang turin a fuih a ni. Rubber hi suma a chan theih hun chu a phun tirh atanga kum 7 lai niin a nghah chhung rei deuh mahse a puitlin tak tak hnuah erawh hahdam taka sum lakluhna hnar tha tak a nih thu Minister Pu R.Lalzirliana chuan a sawi a. Tun dinhmunah rubber chingtute hman tangkai tur hmanraw pawimawh, a tihrona khawl te pawh ngaihtuaha hmalak mek a ni, a ti bawk.
Pu R.Lalzirliana chuan ram ngaw kan suat nasat avangin tui lakna hnar a kang tial tial a, leimin a pung a, khaw lum leh vawt kan tuar nasa ta a, sava veh kan chin avangin pangngang a pung a, heti taka Fall Army Worm in Mizoram lo neitute a bei nasa ta mai pawh hi pangngang ei zotu kan kah zawh zel avang a ni tih a lang reng, a ti a. Sava hi lo neitute thian a ni, tiin ecological balance kan khawih buai avanga kan tawrhnate a ziaawm theih nan infuih thar leh in tihharh thar a pawimawh takzet a ni, Minister chuan a ti bawk.
Khual zahawm Pu Lalrinsanga Ralte pawhin thu sawiin eng kawngah pawh hlawhtling tak tak tur chuan taimak, teirei peih, thahnemngaih leh tumruh a ngai, a ti a. Hlawhtlinna tlanga ding tawhten an paltlang thil harsa hmuh pui si lova hlawk nghal tuma bul tan a fuhlo tiin rubber chingtute chu an hna, an zahawmna, an chhungkaw chawmna leh ram tana thawk an nih hriaa taima turin a fuih a ni. Rubber hi Mizoram tana ro hlu a la tling thei dawn tiin a chingtute chu rilru dik pu turin a chah a. Tih tak takna tel lo, sawrkar atanga tanpuina dawn theih ringawt thlira bul an lo tan a nih chuan an hlawhtlin a rinawm loh thu MLA hian a sawi a ni.
MIRPA General Body meeting hi an President Pu Vanlawma Chhangte chuan a kaihhruai a. Report pe tu, an General Secretary Pu Francis Lianmawia sawi danin Mizoram pumah rubber kung nuai sawm chuang a awm a, chhungkaw sangkhat chuangin rubber an ching. Kuminah chhungkaw 300 in rubber kung nuai khat sing sarih vel an hnai thei dawn a ni. MIRPA hi July ni 10, 2018 ah din a ni a, sawrkar tirhin an pawl atang hian rubber chin leh sawngbawl dan zirin Guwahati ah tum thum training turin an kal tawh a ni.
