Vawiin khan Health & Family Welfare Minister Dr. R. Lalthangliana’n Mizoram Information Service (MIS) officer te insuihkhawm pawl, Mizoram Information Service Association (MISA) Annual Conference 2019 chu I&PR Auditorium-ah a hmanpui.
Health & Family Welfare Minister Dr. R. Lalthangliana chuan MISA member te chu duhsakna hlanin I & PR Department chu Department lian nilo mahse Department tute pawhin kan hnathawh puanzar sak tura kan mamawh an ni a. Indaihloh pawh sawi lovin thawktute chu engtik lai pawhin an inpeih a, an tihtur fel tak leh rang takin an hlenchhuak thin a, mawhphurhna hlenchhuah kawngah an entawntlak hle, a ti a. Mizoram Information Service officer te an chhuanawmin an smart hle tih sawiin taimak chhuah chhunzawm zel turin a fuih a ni. I & PR Department leh Chanchin thar thehdarhtu, state chhung an ni emaw, state pawn an ni emaw, Central sawrkar media unit-te pawh nise, an thawhhona a that hle thu sawiin hei hi chhawmnunga tichak chhunzawm zel turin MIS officer te chu a chah a bawk.
Hun hmasa lamah I & PR Department a enkawl laia thil awm dan leh tun hun lo inthlak danglam dante sawiin tunlai technology leh thiamna mila Department chu thuam chak tul a tih thu sawiin, Minister viak tha tak, department mamawh leh pawimawhna te hrechiangtu in nei chu in vannei hle a ni, Minister Dr. R.Lalthangliana chuan a ti a. I & PR Department a enkawl laia bul tan Mizoram Journalists’ Welfare Fund chu thuthar thehdarhtuten an tangkaipui hle chu lawmawm a tih thu pawh sawi langin chanchinbu mite tan pension scheme tih theih dan kawng dap chhoh tum a nih thu a sawi bawk.
Minister chuan Sawrkar flagship programme SEDP chungchang sawiin SEDP hian a huam zau hle a – kawng tha te, healthcare te leh zirna thlengin a huam dawn a, mimal dawn tur a awm dawn nain, individual beneficiary lam hawi ringawt a bur bun a ni dawn lo tih hriat a ngai a. Hemi atana mipui hrilhriatna leh zirtir kawngah Information Service Officer-te chuan mawhphurhna lian tak an nei dawn nia a hriat thu a sawi a. I & PR chu mipui zirtir leh mipui hnena hriat tur thehdarh kawnga hmalatu pawimawh tak an nih angin Sawrkar hmalakna tihhlawhtlin kawnga an pawimawhzia leh tangkaizia hriaa Sawrkar in kan hman thiam lehzual a pawimawh a ni, a ti bawk.
Conference thawhkhatna First Session hi MISA President leh I &PR Director Pu David L. Thangliana’n a kaihruai a. General Secretary Pu Malsawmsanga’n kum kaltaa pawl hmalakna leh hmachhawp neihte tarlangin Report a pharh a. He hun hi MJA hruaitu leh member te bakah I&PR Joint Secretary Pi Betsy Zothanpari Sailo leh a thawhpui ten an hmanpui bawk a ni.
Second Session ah chuan an pawl inrelbawlna chungchanga Agenda hrang hrang lut te an sawi ho a . Kum 2019-2021 chhung atana MISA hruaitu thlanna neih zui nghal niin President ah Pu C Lalnunkima, Vice President ah Pu F Lalfakzuala, General Secretary ah Pu Malsawmsanga, Secretary ah Pu Andrew H Lalremruata, Treasurer ah Pi Lalnunmawii leh Finance Secretary ah Pi Emily Lalrinpuii te thlan an ni.
